A Casa do Pobo

Plano conservado no Arquivo Municipal de Ourense

No ano 1910, comeza a xestarse a construción dun edificio que dese servizo aos obreiros; reunións, formación, e ata exercicio e diversión, eran os fins para os que se propuña.

Existía xa naqueles tempos, o Circulo Católico de Obreiros, que ocupara instalacións no antigo hospital de San Roque, (alameda), e posteriormente no caserón da rúa Vicente Pérez (Paseo), á beira da actual Delegación de Defensa. Era este un sindicato creado polos grandes empresarios da cidade, e a súa operativa era moi limitada.

Pola súa banda o sector obreiro, e as clases medias, (comerciantes na súa maioría), formaran anos antes o Centro de Sociedades Obreiras (1885), con sede na Praza das Mercedes, pero en cuxo local, non se podían organizar as actividades que reclamaba a sociedade.

Logo de infrutuosos intentos para conseguir un local adecuado, este segundo grupo, aproveita as folgas do 1913, para incluír entre as súas reivindicacións, a construción do edificio. Son os tempos de Manuel Suarez Castro (Manoliño), Manuel Rodríguez, Justo Gutiérrez etc.

Por medio dese acordo, empresarios da cidade, como Fermín García, Isidoro Temes, e Castor Eire, apoiados xenerosamente tamén por Ourensáns de non tan alto poder económico, entre os que figuran profesionais como o propio José Pacheco, ou o doutor García del Villar; realizan as achegas necesarias para comezar o proxecto. Este vería por fin a súa culminación no ano 1915.

Estaba situado, na rúa Progreso, cerca do xardín do Posío, e aproximadamente no mesmo solar que posteriormente ocupou o Colexio Universitario.

Caeu ao redor de finais dos anos 60.

Levo os catro anos que estou a facer o blog, tentando atopar unha fotografia deste edificio, e non fun quen polo de agora de conseguilo, se algún de vos tena, estarialle moi agradecido, que ma deixase.