Cartofilia Ourensá I

Sempre resulta gratificante que falen ben do teu traballo, e felicítenche, sobre todo cando soamente es un afeccionado. O caso é que algún me presupón máis coñecementos dos que realmente teño.

Desde fai tempo, tiña varios mails, pedíndome datos dalgunhas postais, que xenerosamente me enviaba o remitente; dentro das miñas posibilidades intentei dar resposta, e espero que sexa acertada.

O caso é que fai uns días recibín outro mail, preguntándome como empezar unha colección de postais antigas de Ourense, e o primeiro que se me veu á mente, é responder: "con moita paciencia".

Vaiamos á entrada; para axudar aos que estean interesados en facer esa colección, nas próximas entradas, vou intentar facilitarvos uns cantos datos, que espero resúltenvos útiles, aínda que tedes que tomalos como unha simple orientación; calquera especialista no tema, (un saúdo a Cándido), posiblemente póidame facer gran cantidade de correccións.

Unha colección que se prece, ten que contar coas postais destas marcas:

Fototipia Hauser e Menet (Madrid) Entre 1897 e 1905 sacaron ao mercado a súa serie xeral, na cal figuraban todas as provincias españolas; sabendo que Ourense posiblemente non fose das primeiras, estariamos falando de postais da contorna a 1900.

Thomas (Barcelona)
José Thomas Bigas, comezou a súa andaina no mundo do cartón postal, en 1905.
Para conseguir os clichés con maior rapidez, evitando os desprazamentos, contou coa colaboración de fotógrafos profesionais ou afeccionados. No caso de Ourense, tivo a colaboración de Juan Xesta, quen cos ensinos do mestre José Pacheco, fixo incursións no mundo da fotografía. A primeira colección corresponde á primeira década do século XX. pero existe outra posterior, anos 30 na que colaboro coa librería Resvie, (desta supoño que e a colaboracion do sr. Xesta).

Castañeira e Álvarez (Madrid)

Téñoas datadas na contorna a 1905 tamén, se vos fixades foi a época de arranque da produción masiva en España, as causas son variadas, pero a principal supoño que seria que enviar postal en lugar de carta, tiña un prezo máis económico.

Podedelas atopar tamen en anos posteriores como Castañeira Álvarez e Levenfeld.

Continuara.....